Döðluterta

Döðluterta

Döðluterta. Kata vinkona mín er einstaklega glaðleg og „elegant“ kona, sem vílar ekki hlutina fyrir sér, enda leikur allt í höndunum á henni, þar á meðal matargerð. Af henni hef ég þegið ýmis góð ráð og frá henni er þessi lauflétta döðluterta ættuð. Döðlur eru prýðilegt sætuefni, til dæmis í hafragraut, „boozt“ og margt fleira, en auk þess innihalda þær A- og B-vítamín og helling af steinefnum, til dæmis járn.

Valhnetur eru líka afbragðs fæða úr gnægtabrunni náttúrunnar. Einhvers staðar heyrði ég því fleygt, að þær litu út eins og heili til þess að minna okkur á hve góð áhrif þær hefðu á heilastarfsemi og veitir víst ekki af í erli nútímans. Hvort sem það er satt eða logið, er því haldið statt og stöðugt fram, að þær innihaldi mikið af omega-3 og ættu því að lækka vonda kólesterólið í blóðinu.

Súkkulaði, „fæða guðanna“, inniheldur járn, magnesíum, kopar og eitthvað af B-vítamínum. Mörgum þykir þó áhugaverðara ástarlyfið tryptófan sem notað er í framleiðslu á serótónín og framkallar gleðitilfinningu, að maður tali nú ekki um þeóbrómín í kakóbauninni, sem sagt er vera stinningarlyf … Já sæll.

Til hátíðabrigða er tilvalið að skella í þessa fínu köku, sem er bæði létt og „elegant“, eins og Kata sjálf! Og ekki verður sagt að þeyttur rjómi eða góður ís spilli ánægjunni …

Döðluterta

100 g döðlur, smátt skornar

100 g valhnetur, smátt skornar

100 g súkkulaði 70%, smátt skorið

100 g hrásykur (eða minna)

5 msk(vel fullar) spelt hveiti/heilhveiti

4-6 msk vatn

2-3 msk góð olía

2 stk egg

1 tsk vínsteinslyftiduft

1/2 tsk salt

Skerið döðlurnar niður og veltið upp úr hveitinu í skál, svo að þær klessist ekki. Hrærið saman vatn, olíu, egg, lyftiduft, sykur og salt í hrærivél.  Blandið svo öllu öðru hráefni vandlega saman við og látið standa í smá stund við stofuhita til að brjóta sig, u.þ.b. 15 mín.Setjið bökunarpappír í botninn á 24 sm lausbotna formi, smyrjið hliðarnar svolítið með olíu, bakið í u.þ.b. 35-40 mín. við 150°C. En það er segin saga, að ekki er alltaf að treysta á bökunartíma í uppskriftum, enda er hver ofn með sína dynti og duttlunga. Ein vinkona mín segist finna það á lyktinni þegar kakan er til, en hún er líka með sex skilningarvit.

PDF til útprentunar

Döðluterta

Dodluterta

 

One thought on “Döðluterta

  1. Sá þessa rétt fyrir kvöldmat, kíkti inn í skáp að ath hvort ég ætti ekki allt í eina svona.
    Átti allt nema valhnetur (notaði möndlur og pecanhnetur) , hrærði í köku og skellti inn í ofn… gleymdi að lækka hitann (ofninn minn fer sjálfkrafa á 180 og blástur) þannig að kakan bakaðist á 30 mín og var himnesk. Bar hana fram með ís…. mmmmm mæli með henni !

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>