Brownies á páskum

BrowniesBrownies eru svo amerískar að það er eiginlega ekki hægt að þýða
nafnið, viltu brúnkur heillin? Seigar í miðjunni og svolítið stökkar á
yfirborðinu eru þær ómótstæðilegar þegar mikið stendur til. Og þær
klárast! Ef ekki, laumast maður, eins og Nigella, seint að kvöldi í
ísskápinn, stynur um leið og maður bítur í eina freistandi brownie og
fær sér íííískalda mjólk með. Þetta má ALLS ekki verða daglegt brauð,
hér er ekki um hollustufæði að ræða! En hvað væri lífið án þess að
syndga pínulítið einu sinni á ári?

Brownies

70 g 70% súkkulaði

100 g 56% súkkulaði

150 g smjör

200 g sykur

2 tsk vanilludropar

3 stór egg

100 g hveiti

1/2 tsk lyftiduft

Ef vill: 100 g þurr-ristaðar heslihnetur eða aðrar hnetur …

Hitið ofninn í 160°C.
Setjið bökunarpappír í 20×20 sm form.
Bræðið súkkulaði og smjör saman. Hellið í hrærivélarskálina og þeytið
sykur og vanillu saman við. Þeytið eggin út í, eitt í einu. Þeytið
áfram þar til deigið er mjúkt og glansandi.
Sigtið hveiti og lyftiduft út í deigið og hrærið stuttlega saman við á
lægsta hraða. Blandið hnetum saman við með skeið.
Hellið í formið; bakið þar til tannstöngull kemur út með rökum bitum í
miðju, hann á ekki að vera þurr, 35-40 mínútur.
Kælið vel á grind. Skerið í ferninga.
Gerir 12-16 brownies.

Páskatertur síðustu ára:
 
Páskatertan 2014 var með döðlubotni, eggjakremi og marengs
Páskatertan 2013: Daim-ís-terta

Leave a Reply

Your email address will not be published. Required fields are marked *