Special Vigdísar kjúklingur
Á dögunum var ég niðursokkinn við að leita að góðri kjúklingauppskrift – þá hringdi Vigdís. Hún sagði mér frá vinsælum rétti á sínu heimili. Kjúklingur hjúpaður muldu Special K kornflexi. Vigdís var tekin á orðinu og rétturinn bragðaðist einstaklega vel. Athugið að það þarf að minnsta kosti heila matskeið af kryddinu – Special K er nokkuð sætt eins og sumt morgunkorn (sem samt er auglýst sem heilsufæði).
— KJÚKLINGUR — KORNFLEX — VIGDÍS VIGNIS —
.
Special Vigdísar kjúklingur
4 kjúklingalæri
1 egg
3 msk mjólk
1 msk kjúklingakrydd frá Prima
2 dl mulið Special K kornflex
½ dl brauðrasp
1-2 dl góð olía
Brjótið eggið í skál og bætið mjólkinni og kryddinu saman við og hrærið vel saman. Blandið saman í aðra skál mulda kornflexinu og raspinu. Veltið lærunum upp úr eggjablöndunni og síðan upp úr raspinu. Þrýstið kornflex/raspi vel á lærin. Leggið þau í eldfast form. Hellið olíunni varlega yfir (passið að raspið fari ekki af kjötinu). Setjið álpappír yfir og bakið í 160° heitum ofni í um 1 1/2 klst.
–
— KJÚKLINGUR — KORNFLEX — VIGDÍS VIGNIS —
— SPECIAL VIGDÍSAR KJÚKLINGUR —
—
