Makkarónuterta Margrétar

P1013381 P1013408

Makkarónuterta Margrétar Eggertsdóttur. Ókrýnd tertudrottning Íslands, Margrét Eggertsdóttir, altsöngkona, hefur áður verið nefnd á þessari síðu. Hún dreifði uppskriftum ekki endilega um allar jarðir. Hugsanlega var það vegna þess að hún átti erfitt með að gefa upp hlutföll sem voru byggð á tilfinningu, aðrir höfðu kannski ekki töfrakokkatilfinninguna hennar og réttirnir áttu til að verða öðruvísi en fullkomnir og jafnvel ekki eins og hún vildi sérstaklega kenna sig við. Því bauðst hún oft til að baka fyrir fólk og sagðist gera það með vinstri hendinni og hinni út um gluggann. Það voru víst orð að sönnu, hún virtist ekkert hafa fyrir því að galdra fram rétti og tertur sem fólk féll í stafi yfir 🙂 Bergþór var samt nokkuð laginn við að biðja hana um að setja á blað svona sirka hvað hún gerði. Hér er makkarónueftirréttur, sem flestir átu yfir sig af. Svona skrifaði hún þetta upp og einhvern veginn ískrar alltaf húmorinn í gegn, ekki spara neitt voða mikið, les: MIKIÐ, Vel af rjóma, les: MIKIÐ:
Sulla góðu sérrí á rúsínur (ekki spara það neitt voðalega mikið). Mylja makkarónur út í
Brytja suðusúkkulaði, Toblerone (ekki smátt) og perur úr dós og blanda saman við.  Vel af rjóma yfir.

Þetta gengur víst ekki alveg í nútímanum, nú viljum við hafa málin nákvæm og orðalagið aðeins öðruvísi. Þó Margrét vinkona mín, sem ég hitti að vísu bara einu sinni, hafi notað niðursoðnar perur þá held ég að hún fyrirgefi mér þó ég hafi ferskar hér. Makkarónuterta fær að heita áfram makkarónuterta 🙂 og verður að sjálfsögðu kennd við Margréti

Makkarónuterta Margrétar

1 1/2  dl sérrý

1 dl rúsínur

1 b makkarónur, muldar gróft

1/2 b Toblerone, brytjað gróft

3 ferskar perur, flysjaðar og skornar frekar gróft.

1/2 l rjómi.

Hellið sérrýinu yfir rúsínurnar og látið bíða í amk 3-4 klst. Bætið við makkarónum, súkkulaði og perum og blandið vel saman. Þeytið rjómann og setjið yfir. Skreytið með rifnu súkkulaði.

PDF til útprentunar

Þið megið gjarnan deila þessari dásemdar uppskrift Margrétar á Facebókinni, Pinterest og víðar.

2 thoughts on “Makkarónuterta Margrétar

  1. Sæll og blessaður, mikið var ég nú glöð að rekast á þetta blogg hjá þér, mér þykir alveg óendanlega vænt um það því makkarónukaka Margrétar er ein af uppskriftum ömmu minnar sem þú vísar í.
    Uppskriftirnar hennar ömmu eru gersemar mínir í dag þó að ég skilji þær ekki alveg þar sem hlutföllin vantar á sumar þeirra en minning um allar dásemdirnar hennar úr Hjálmholtinu lifa áfram í góðri minningu.
    Með kærri kveðju Margrét

Leave a Reply

Your email address will not be published. Required fields are marked *