Ávaxtakaka prestsfrúarinnar

Avaxtakaka prestfruarinnar

Ávaxtakaka prestsfrúarinnar. Að aðventunni fengum við bragðgóða sendingu. Steinvör og Helga prestsdætur frá Kolfreyjustað sendu dásamlega sérrýlegna ávaxtaköku sem Steinvör bakaði eftir uppskrift mömmu þeirra (og ömmu). Kakan minnti mig bæði á barnaafmælin á Kolfreyjustað og ekki síður á kaffisamsætin að loknum messum. Messukaffin þóttu mér dásamlegar samkundur (en ekki hvað, með öllu kaffimeðlætinu…) og á frá þeim sælar minningar. Steinvör bakaði margar ávaxtakökur fyrir jólin og gaf. „Klukkan var orðin held ég þrjú um nótt þegar ég var búin að baka allar kökurnar. Daginn áður skar ég í fulla mjög stóra skál af döðlum og súkkulaði (fékk blöðrur á puttana) og það dugði ekki minna en heil sherrýflaska yfir.  Það eru svo sannarlega sterkar æskuminningar með þessari köku, hún minnir mig  alltaf á kirkjukórinn heima og messurnar. Ávaxtakakan var oft á borðum eftir messur og kóræfingar. Uppskriftin held ég að komi frá ömmu Guðnýju eins og svo margur annar góður matur í fjölskyldunni.“

Ávaxtakaka prestsfrúarinnar

5 dl döðlur, smátt skornar

4 dl rúsínur

100 g dökkt gott súkkulaði, saxað

1/2 pk súkkat

4 dl niðursoðin græn og rauð koktelber, skorin í litla bita

3 dl sérrý

Leggið döðlur, rúsínur, súkkulaði, súkkat og koktelber í sérrýið og geymið í ísskáp yfir nótt (eða lengur).

 

300 g smjör, við stofuhita

300 g sykur

6 egg

300 g hveiti

1 tsk lyftidufti

1/2 tsk salt

Þeytið smjör og sykur vel saman þar til það er létt og ljóst, bætið við eggjunum einu og einu. Látið þurrefnin út í og hrærið. Bætið sérrýávöxtunum (og sérrýinu) varlega saman með sleif.

Smyrjið vel tvö jólakökuform, látið deigið í og bakið við 150 gráðu í 100 mínútur.

Kakan geymist mjög vel og gott er að vefja hana í álpappír og svo í plastpoka, þannig geymist hún mjög vel.

Ávaxtakaka

avaxtakaka

Myndin er tekin í barnaafmæli á Kolfreyjustað. Þórhildur er aftast fyrir miðju. Hávaxnari ljósklædda stúlkan í fremstu röð er Steinvör, þá Helga systir hennar og sjálfur stend ég henni við hlið með hendur í vösum.

Kolfreyjustaðarkirkja

Kolfreyjustaðarkirkja á Fáskrúðsfirði

Leave a Reply

Your email address will not be published. Required fields are marked *