Apótekið restaurant – jólamatseðill á aðventu
Nú virðast gömlu jólahlaðborðin vera að renna sitt skeið og veitingahús hafa útbúið matseðla þar sem réttirnir eru bornir á borðið. Við brugðum okkur á Apótekið í slíka hádegisveislu og urðum ekki sviknir.
Þetta fór vel af stað með volgu súrdeigsbrauðinu, en nú var búið að bæta í jólalegum, en ávanabindandi efnum; trönuberjum og hvítu súkkulaði . Með brauðinu var hrært smjör. Hreinasta ljúfmeti.
Íslenskt landslag. Nautatartar með stökku, þurrkuðu rúgbrauði undir, reyktum rjómaosti, pikkluðum lauk og edikssnjó yfir. Jólalegt, þjóðlegt, ljúffengt og í fullkomnu jafnvægi. Eftir krókaleiðum reyndum við að fá að vita leyniaðferðina við jólasnjóinn en útsendarinn okkar hafði ekki erindi sem erfiði – leyndó er leyndó 🙂
Ferskt og einfalt grænmetissalatið var bragðgott með spínati, radísum, tómötum, rauðrófum og stökku berjabrauði og steiktu kínóa, sem gaf skemmtilegt crispy twist.
Lax og andabringa voru borin saman. Laxinn var bragðmikill, grafinn í te, borinn fram með skallottukremi, dillmæjónesi, hrognum og grilluðum súrdeigsbrauðsþynnum, en andabringan, sem var með nettu grillbragði, ákaflega ljúffeng, með silkimjúku gulrótarkremi og portvínssultu. Ég legg ekki meira á ykkur.
Kokkarnir eru í ekki neinum vandræðum ef grænmetisætur ber að garði. Það var ekki hent nokkrum salatblöðum á disk, heldur útbjuggu þeir grillaðan aspas með shitake sveppum, rjómaosti og fínlegri dill vinegraitte, rosalega gott!
Grilluð nautalund var passlega stór, yndislega mjúk en þétt, með himneskri silkimjúkri kaffi-hollandaise sósu, jarðskokka- og hvítsúkkulaði-mauki, steiktum næpum með heslihnetum og sveskjum sem gáfu stökkan og sætmjúkan tón. Algjört gúmmúlaði.
Grænmetisrétturinn var grillað blómkál með rauðrófum. Hrikalega gott blómkálsmauk batt það saman, en pikklaður laukur og dill setti punktinn yfir i-ið. Það er til marks um flotta kokka, þegar ekkert mál er að svissa yfir í grænmetisrétti sem standast algjörlega samanburð við hefðbundinn matseðil. Þetta eru kokkar sem kunna sitt fag.
Jólalegur eftirréttur „Jólakúla“ úr epla- og fáfnisgrasfyllingu á kryddkexi, karamelliseraðri hvítsúkkulaðimús undir. Til hliðar var svo ískaldur sítrónusorbet. Snilldarsamsetning.
