Jólaglaðningur og útskýring í bundnu máli (frá Páli)

Matarjólaglaðningur. Hver hefur ekki lent í vandræðum með að finna gjöf fyrir þá sem „allt eiga”? Gjafir sem eyðast eru stórfínar, líka þær sem er hægt að borða. Undanfarin ár, svona rétt fyrir jólin, höfum við farið í bíltúr og fært nokkrum vinum og ættingjum smá jólaglaðning, matarjólaglaðning. Með fylgir útskýring í bundnu máli eftir tengdapabba, Pál Bergþórsson ásamt jóla- og nýárskveðju. Þetta er hin skemmtilegasta útkeyrsla. Hér má sjá nokkur dæmi

Ber í rommi

Kannski er hægt að hugsa sér,
er hækkar blessuð sólin,
ber í rommi bragðist þér
bara vel um jólin.

Sítrónusmjör/Lemon curd

Við bjóðum líkast til Lemon curd
sem logagyllt seður hvern matarnörd,
því ofan á brauð má það alveg jeta
úr eggjum og smjeri að hætti Breta.

Steinaldabrauð

Hér kemur þjóðráð við hungursnauð:
Af hollustu þrungið STEINALDARBRAUÐ
og jólakrydd ljúffengt það bragðlaukum býður
og betur en flest gegnum þarmana líður.

 

Jólaleg bláberjasulta

Ef bláber og krækiber kremjið þið
og komið þeim saman í pott
með kanel og negul og vanillu við,
þá verður það hollt og flott.
Það eykur á jólanna fegurð og frið
að fá sér í munninn gott.

Leave a Reply

Your email address will not be published. Required fields are marked *