Þórhildur Helga og Bogi bjóða til veislu

Þórhildur Helga og Bogi bjóða til veislu. Gestabloggaraleikurinn heldur áfram, Þórhildur Helga, æskuvinkona og sveitungi minn og Bogi hennar maður héldu matarboð. Auk okkar Bergþórs buðu þau öðrum vinahjónum Hildigunni og Helga.

Gefum Helgu orðið: „Það er alltaf gaman að fá góða gesti í matarboð og að þessu sinni buðum við hjónin þeim eðalhjónum Helga og Hildigunni og þeim Epalhjónum Alberti og Bergþóri. Þrátt fyrir að þeir Albert og Bergþór séu þekktir matgæðingar þá vorum við óbangin við að elda fyrir þá, því frúin á heimilinu leiddi Albert á sínum tíma inní heim matreiðslunnar þegar hún á áhyggjulausum æskuárum þeirra kenndi honum að drullumalla ægifagrar moldarkökur.
Okkur finnst alltaf gott að vera fyrirhyggjusöm og útbúa mat sem hægt er að gera með góðum fyrirvara. Því var hreindýrið tilbúið í kistunni, sem og eftirrétturinn. Kjúklingurinn lagður í kryddlög kvöldið áður og var hann því orðinn fallega fjólublár þegar kom að eldamennskunni.
Það þurfti því eingöngu að elda kjúklinginn þennan daginn og gera músina. Þá var góður tími til að nostra við að leggja ættarsilfrið og kristalinn á borðið og dedúa síðan við að raða forréttinum á diska sem og eftirréttinum. Þeim diskum var síðan raðað inn í ísskáp og biðu þar gestanna í ró og næði. Því var ekkert stúss á milli rétta við að útbúa eitt né neitt heldur einbeita sér að hinum skemmtilegu gestum.
Það er skemmst frá að segja að matarboðið heppnaðist vonum framar, setið lengi við matarborðið- spjallað og hlegið, sem er svo gott fyrir sálina.”

#2017Gestabloggari11/52

 

 

Hreindýra- Carpaccio

Hreindýrakjöt

Ólífuolía

Flögusalt

Svartur pipar

Klettasalat

Ristaðar furuhnetur

Parmasanostur

Balsamsýróp

Góður vöðvi- þerraður, ólífuolía pensluð á- flögusalt og nýmalaður svartur pipar nuddað á vöðvann. Pakkað þétt inn í plastfilmu. Gott að láta standa í sólarhring og setja síðan í frysti.
Tekið úr frysti þann dag sem skal etast. Þegar vöðvinn er hálfþiðinn er hann skorinn í örþunnar sneiðar. Þeim raðað á disk, klettasalat sett ofaná, ristaðar furuhnetur og gróft rifinn parmasenostur. Balsamsýrópi driplað yfir.
Hið franska eðalvín Domaine de La Baume syrah er stórgott með forréttinum.

  

 

Fjólublár kjúklingur í potti

2 kjúklingar hlutaðir í 6 bita hvor

Kryddlögur

2 gulrætur saxaðar

2 laukar saxaðir

2 hvítlaukar smátt skornir

3 stangir sellerý saxað

svartur pipar

salt

4 lárviðarlauf

1 matskeið Timjan

1 flaska rauðvín- Casillero del Diablo- shiraz

Kryddlögurinn gerður- kjúklingurinn settur út í og látið standa í ísskáp í sólarhring.
Kjötið tekið úr leginum og þerrað. Steikt á pönnu. Sett í góðan ofnpott- og leginum bætt við.

500 g sveppir steiktir á pönnu

15 sharlottlaukar skornir í tvennt og steiktir

250 g beikon skorið gróft og steikt.

Beikoni, sveppum og lauk bætt í pottinn.

2 matskeiðar af fljótandi kjúklingakrafti bætt við

Sósujafnara stráð yfir.

Látið sjóða- setjið þá lokið á pottinn og inn í 120°C heitan ofn í 2 klukkutíma. Þegar kjúklingurinn er borinn fram er hálft steinseljubúnt klippt yfir.

Kartöflumús

3 sætar kartöflur

5 bökunarkartöflur

2 dl rjómi

1 krukka fetaostur

sýróp

salt

valhnetur

Kartöflurnar skrældar og skornar niður. Soðnar vel. Stappaðar og rjóma, sýrópi, salti, fetaosti með olíunni blandað við. Valhnetum stráð yfir.
Blandað saman klettasalati og steinselju og berið fram með kjúklingnum og músinni.
Með herlegheitunum var dreypt á hinu stórgóða Casillero del Diablo shiraz með matnum.

 

Portómasú með súkkulaði

5 dl. rjómi

300 g 56 % súkkulaði

400 g mascarpone ostur

2 msk. flórsykur

3 dl. portvín – Oldinvalid porto frá Sandeman

2 dl. sterkt kaffi- kalt

20 stk fingurkex ( ladyfingers)

3 egg

Blæjuber og brómber

1,5 dl rjómi og súkkulaðið brætt saman við vægan hita. Kælt.
Eggjahvíturnar þeyttar sér og settar til hliðar.
Restin af rjómanum þeytt og settur til hliðar.
Eggjarauður þeyttar, mascarponeosti bætt við, flórsykri og 1 dl af portvíninu. Þegar blandan er orðin létt og fín er eggjahvítunum og rjómanum bætt varlega saman við.
Restinni af portvíninu og kaffi blandað saman og fingurkexið lagt í og raðað í form. Þriðjungi af súkkulaðinu dreift yfir síðan helmingurinn af rjómaostblöndunni, þriðjungi af súkkulaði þar yfir og restinni af rjómaostblöndunni þar næst, súkkulaði dreift yfir í lokin.
Þennan rétt má gjarnan frysta og skera síðan í huggulegar sneiðar á eftirréttadiska, brómber og blæjuber sett með. Ljómandi gott með sterku kaffi og portvíni.

 

Leave a Reply

Your email address will not be published. Required fields are marked *