Cordon Bleu a la Pabbi – Ari Ólafs söngvari

Cordon Bleu a la Pabbi. Ari Ólafsson hefur skotist upp á stjörnuhimininn með laginu Our Choice í Söngvakeppni Sjónvarpsins. Röddin er ekki bara glæsileg, heldur hefur hann óvenjulegt raddsvið upp á háaloft og niður í kjallara, en fólk hefur ekki síður heillast af framkomu hans og einstakri útgeislun. 

Ég spurði Ara hver væri uppáhaldsmaturinn hans. Hann sagðist ekki enn vera mikill kokkur, en Cordon bleu, „eins og pabbi gerir“ væri í algjöru uppáhaldi.

Foreldrar hans eru Ólafur Gunnar Guðlaugsson, grafískur hönnuður og rithöfundur, og Herdís Finnbogadóttir, sálfræðingur og sérfræðingur í nútvitund. Kannski ekki furða þótt sonurinn virðist sérlega vel tengdur við jörðina. Pabbinn tók vel í að skella í eitt Cordon bleu og viðbrögðin létu ekki á sér standa.

Cordon bleu þýðir blái borðinn og vísar til merkiborða, sem bestu riddararnir í riddarasveit Henri þriðja, báru á 16. öld. Cordon bleu hefur einnig víðari merkingu yfir eldamennsku af bestu sort. 

Talið er að þessi réttur sé kominn frá Sviss, hans er fyrst getið í matreiðslubók þar árið 1949.  Cordon Bleu samanstendur af kálfa- eða kjúklingakjöti, osti, skinku, eggjum og raspi. Til eru fjölmargar útgáfur af cordon bleu eins svína-Cordon blue með sveppumog osti. 

 „Alltaf er hann bestur Blái borðinn“ var slagorð frá Ragnari í Smára, en á 4. áratugnum hóf hann framleiðslu á vítamínbættu smjörlíki, sem kallað var Blái borðinn. Ragnar var alltaf með á nótunum. Eftir að Blái borðinn kom fram, á 5. áratugnum, var heitið notað á rétt í uppskriftabók, þar sem kálfakjöts-snitsel var vafið utan um ost og skinku, en brauðrasp sett utan á og steikt eða bakað. Ýmis afbrigði hafa svo orðið til, t.d. að setja beikon utan um í stað brauðrasps. Á Spáni heitir rétturinn San Jacobo, þar sem kjúklingur er notaður í stað kálfakjöts með Serrano skinku.

 

 

Cordon Bleu a la Pabbi

4 kjúklingabringur

8 sneiðar Lúxusskinka

2 stórar Mozzarella kúlur

200g smjör

2 b rasp

2 egg

salt og pipar

1 1/2 b rifinn Parmesan ostur

Sósa

1 stk. Piparostur

2 dl rjómi

Skerið bringurnar langsum til helminga, en án þess að þær skiljist að, þannig að þú ert með einn flöt. Lemjið aðeins til að þinna enn betur.

Blandið raspi, salti og pipar vel saman í skál. Bætið síðan góðum skammti af rifnum Parmesan osti í blönduna. Parmezan osturinn er trikkið!

Brjótið eggin í skál og þeytið.

Veltið bringum uppúr eggjablöndu, síðan yfir í raspið, en NB bara aðra hliðina. Setjið til hliðar, rasp-hlið niður, setjið 3 sneiðar af Mossarella, 1-2 sneiðar af skinku á aðra hlið bringunnar, lokið síðan með hinni hliðinni.

Raðið bringunum í eldfast mót, sem búið er að smyrja vel að innan. Bæta nokkrum smjörklípum ofan á bringurnar og til hliðanna, bræðið enn meira smjör og hella yfir bringurnar, samt ekki of mikið. Við viljum hafa smjör til að þetta steikist en ekki allt á kafi í því.

Rífið enn meiri Parmesan yfir eftir þörfum.

Forhitið blástursofn í 205 gráður. Steikið í ofni í um 40 mínútur eða þar til þetta lítur fáránlega vel út. Ef menn vilja þá má setja Mozzarellasneiðar ofan á bringurnar í ofninum.

Sósa

Sósugerðin tekur allt að 45 mínútur. Ekki á miklum hita, gott að gefa sér tíma. Setja örtítið vatn í lítinn pott, rétt svo botnfylli, bæta smá klípu af kjúklingatening, hitið þar til uppleyst. Skerið niður piparostin í þunnar sneiðar, setja út í pottinn og vænan slurk af rjóma svo hann nái yfir ostinn. Hitið á vægum hita, hrærið jafn óðum þar til osturinn er fullkomlega leystur upp. Látið krauma meira, bætið við meiri rjóma, ef þarf.

Berið fram með salati og frönskum

NB. Ef menn vilja, þá má djúpsteikja bringurnar, í stað þess að setja þær í ofn.

Fjölskyldan í golfi: Ari, Ólafur, Herdís og Ragnar

Leave a Reply

Your email address will not be published. Required fields are marked *