Flatbrauð/flatkökur

Flatbraud

Flatbrauð. Reglulega hringi ég í móður mína til að fá hjá henni uppskriftir og ráðleggingar um eitt og annað er við kemur bakstri og fleiru. Nú var komið að því  að bretta upp ermar og steikja flatbrauð í fyrsta skipti….. Mamma veitti góð ráð eins og oft áður. Fyrir langa löngu heyrði ég gamla frænku mína segja að galdurinn við flatbrauðsdeigið væri að nota sjóðandi vatn saman við mjölið. Annars mun það hafa þekkst í gamla daga að konurnar báru feiti á hendurnar á sér áður en þær hófu að hnoða deigið. En við í nútímanum veljum góða matarolíu í deigið.

Það kemur allmikil bræla þegar flatbrauðið er steikt á hellunni, munið því að opna alla glugga og munið að reykskynjarar geta farið í gang

Flatbrauð

300 g rúgmjöl

200 g heilhveiti

1 tsk salt

1 msk sykur

1 msk góð matarolía

3 – 3 1/2 dl sjóðandi vatn

Hveiti til að hnoða

Blandið saman í skál rúgmjöli, heilhveiti, salti, sykri og matarolíu. Hellið sjóðandi vatni yfir og blandið vel saman. Látið kólna lítið eitt og hnoðið deigið með hveiti og fletjið út í þunnar kökur og mótið kringlóttar kökur – með því að leggja disk á deigið og skera með brún disksins. Pikkið þær með gaffli og steikið á vel heitri eldavélarhellu eða á gasgrillinu. Dýfið kökunum í kalt vatn strax að lokinni steikingu til að stöðva brunann.

2 thoughts on “Flatbrauð/flatkökur

Leave a Reply

Your email address will not be published. Required fields are marked *