Saltfisksnittur – lostæti hið mesta

Saltfisksnittur

Saltfisksnittur með hvítlauk. Þetta er hlægilega einfalt, en slær alltaf í gegn. Þetta er frekar stór uppskrift, en ef afgangur verður, er gott að eiga þetta lostæti í ísskápnum. Þetta er líka slumpuppskrift, það má alveg breyta hlutföllum eftir smekk.

Saltfisksnittur með hvítlauk

800 g soðinn saltfiskur

2 dl mjólk

2 dósir sýrður rjómi

100 g majones

3-8 rifin hvítlauksrif eftir smekk

A.m.k.1 tsk hvítlauksduft, 1/2 tsk pipar, cayenne á hnífsoddi.

2 snittubrauð, mjó (flûte), gott er að hægt sé að stinga heilum bita upp í sig, þessi mjóu í Bónus eru ágæt.

Sjóðið saltfiskinn í mjólk og kælið. Stappið með gaffli, ekki mjög smátt, ekki er verra að finna fyrir saltfiskbitum undir tönn.

Blandið sýrðum rjóma, majonesi, hvítlauk og kryddi saman í skál og hrærið saltfiskinn út í. Bætið í kryddi þar til bragðsinfónía fer að hljóma, en gott er að láta standa yfir nótt.

Steikið 1 hvítlauksrif í sneiðum í 1/2 dl af olíu og fjarlægið hvítlaukinn (annars brennur hann síðar). Steikið snittubrauðssneiðar öðrum megin við allháan hita í olíunni og setjið á disk. Bætið olíu á pönnuna, ef hana tekur að þverra.

Setjið maukið á steiktu hliðina með tveimur teskeiðum, þegar sneiðarnar eru orðnar kaldar. Malið pipar yfir og skreytið með steinselju eða öðru sem er við hendina.

3 thoughts on “Saltfisksnittur – lostæti hið mesta

  1. Pingback: Saltfisksnittur | Ektafiskur

Leave a Reply

Your email address will not be published. Required fields are marked *